الصبور في البصرة هو السمك الوحيد الذي يباع بعدد زوجي وليس بالوزن !

التفاصيل

المجموعة: الفضاء الحر

تم إنشاءه بتاريخ السبت, 23 نيسان/أبريل 2022 16:18

نشر بتاريخ السبت, 23 نيسان/أبريل 2022 16:18

كتب بواسطة: ناظم

الزيارات: 2610

جبا - الفضاء الحر :

يتساءل البعض من باقي المحافظات العراقية عن السبب الذي يشرع بائعي الاسماك في البصرة لبيعهم سمك الصبور وهو السمك الوحيد الذي يباع بطريقة العدد (زوج الصبور سمكتين) للمشتري ، وليس عن طريق الوزن الكيلوغرام كحال بقية الاسماك ؟! ، وهل هناك تفسير او علاقة تاريخية بالامر ؟؟؟!

وعندما تسأل (البصراوي ) شنو غداكم يجاوبك (صبور) لان البصرة تشتهر بها الكائنات البحرية الى اربعة اقسام ، وانواعها هي:

( السمچ على انواعه - والصبور - والزبيدي - والروبيان ).. الذي يسميه البعض في باقي المحافظات ويطلقون عليه تسمية (الدود ) !

وللصبور معزة خاصة جدا عند اهل البصرة ، وبالخصوص كوجبة مهمة تقدم الى الضيوف ، حيث يكون الوجبة الرئيسية في الغالب لكل يوم جمعة اثناء موسم الصبور، من نهاية شهر شباط الى نهاية شهر حزيران.

الصبور ينباع بالعدد وليس بالوزن كباقي انواع السمك وطبعا البصاروة يفضلون صبورة الشط على صبورة البحر لان اثناء انتقالها من الماي المالح للماي الحلو لوضع البيوض يصير عليها تغيير بايلوجي يجعل طعمها اطيب. 

تتملح الصبورة يم السماچ بعد ما يشكها من الظهر وتوصل للبيت تنغسل وتتملح وتتحشة ببصل وثوم ونومي بصرة وياها قليل من المعجون وتمر الهند ويندكن بهاون او بخلاط وينمسح ظهر الصبورة بتمراية وينزلن لتنور مجمر بشلاخ نخل واكو طريقتين للشوي اما السمجة مفتوحة يعني بطنها وظهرها تتعرض للنار او مغلقة يعني بس الظهر تلفحه النار والبطن تستوي براحتها.

وسمك الصبور يؤكل مع الخبز والبصل او مع التمن الابيض او التمن الباقلاء مع الشبنت .. اما التمن الاحمر ، فمايصير مع الصبور بعدما تخلص من صبورتك تشرب وراها كلاص لبن وفندوس تمر وتنام نومة اهل الكهف .. وتفقدك الوعي. . وتكعد كانه فاكك البنج من عملية فوق الكبرى. !!

ولذلك يقال عن الصبور ويشتهر المثل الذي يقال عنه بأنه (ماكول مذموم ) ..واطيب جزء في الصبورة هو بطن الصبورة الجزء الوسطاني جوةالراس بصبعين والاطيب من الصبور نفسه هو الثروب مال الصبور من تطلع حارة من التنور.